ഡിസംബര്‍ 7
മംഗളവാര്‍ത്തക്കാലം  രണ്ടാം ഞായര്‍
ഉത്പ 3:8-24  ജറെ 33:14-26
വെളി 5:1-5   ലൂക്കാ 1:26-38

   മംഗളവാര്‍ത്ത രണ്ടാം ഞായറാഴ്ച തിരുസ്സഭ ധ്യാനവിഷയമാക്കുന്നത് പരിശുദ്ധകന്യാമറിയത്തിനു ലഭിക്കുന്ന മംഗളവാര്‍ത്തയും അതിനോടുള്ള മറിയത്തിന്റെ പ്രത്യുത്തരവുമാണ്. ദൈവം മനുഷ്യകുലത്തിനു നല്കിയ രക്ഷയുടെ വാഗ്ദാനത്തിന്റെ പൂര്‍ത്തീകരണമാണ് മിശിഹാസംഭവത്തിലൂടെ യാഥാര്‍ഥ്യമാകുന്നത്. മനുഷ്യകുലത്തിനു ദൈവം നല്കിയ രക്ഷയുടെ വാഗ്ദാനമാണ് ഉത്പത്തിപ്പുസ്തകത്തില്‍നിന്നുമുള്ള ഒന്നാമത്തെ പ്രഘോഷണത്തില്‍ ശ്രവിക്കുന്നത്. പാപത്തില്‍ വീണുപോയ മനുഷ്യകുലത്തെ വീണ്ടെടുക്കുന്നതിനും തിന്മയുടെ ശക്തിയെ നശിപ്പിക്കുന്നതിനും ഒരു രക്ഷകന്‍ വരുമെന്ന വാഗ്ദാനമാണ് ദൈവം നല്കുന്നത്. ഉത്പത്തിപ്പുസ്തകം 3:15 ആണ്  പ്രോട്ടോ എവന്‍ഗേലിയോന്‍ (ആദ്യസുവിശേഷം) എന്നറിയപ്പെടുന്നത്. ഇസ്രയേല്‍ഭവനത്തെക്കുറിച്ചും യൂദാഭവനത്തെക്കുറിച്ചുമുള്ള ദൈവത്തിന്റെ വാഗ്ദാനം പൂര്‍ത്തിയാകുന്നതിനെക്കുറിച്ചാണ് ജറെമിയാപ്രവാചകന്റെ പുസ്തകത്തില്‍നിന്നുമുള്ള രണ്ടാം പ്രഘോഷണം. ദാവീദിന്റെ വംശത്തില്‍നിന്ന് ഒരു മുള കിളിര്‍പ്പിക്കും എന്നത് വരാനിരിക്കുന്ന മിശിഹായെക്കുറിച്ച് ജറെമിയാപ്രവാചകന്‍ നല്കുന്ന  പ്രവചനമാണ്.    വെളിപാടുപുസ്തകത്തില്‍നിന്നുമുള്ള മൂന്നാമത്തെ പ്രഘോഷണം യൂദാവംശത്തില്‍നിന്നുമുള്ള സിംഹവും ദാവീദിന്റെ വേരുമായവന്‍ വിജയിച്ചിരിക്കുന്നു എന്നു പറയുന്നത് തിന്മയുടെമേല്‍ വിജയം വരിച്ച മിശിഹായെക്കുറിച്ചാണ്.  മിശിഹായുടെ മനുഷ്യാവതാരത്തെക്കുറിച്ചുള്ള മംഗളവാര്‍ത്തയാണ് സുവിശേഷത്തില്‍നിന്നു ശ്രവിക്കുന്നത്. 
    അനാദിയിലേ വചനത്താല്‍ സര്‍വതും സൃഷ്ടിച്ചവന്‍, (ഉത്പത്തി 1) കാലാകാലങ്ങളില്‍ പ്രവാചകന്മാരിലൂടെ, വചനത്തിലൂടെ സംസാരിച്ചിരുന്നവന്‍ (ഹെബ്രായര്‍ 1:1) സമയത്തിന്റെ പൂര്‍ണതയില്‍ മനുഷ്യനായി അവതരിക്കാന്‍ തീരുമാനിച്ചപ്പോള്‍ തന്റെ ദൂതന്‍ ഗബ്രിയേലിനെ നസ്രത്ത് എന്ന ഗ്രാമത്തിലേക്ക്, ഒരു കന്യകയുടെ പക്കലേക്ക് അയയ്ക്കുന്നതാണ് സുവിശേഷത്തില്‍ നാം കാണുന്നത്. നസ്രത്ത് എന്ന സ്ഥലവും, കന്യകയുംതന്നെ വരാനിരിക്കുന്ന മിശിഹായെക്കുറിച്ചുള്ള ഏശയ്യായുടെ പ്രവചനത്തിലേക്ക് (ഏശയ്യാ 7:14; 11:1) നമ്മുടെ ശ്രദ്ധ ക്ഷണിക്കുന്നുണ്ട്. ഏശയ്യാ 7:14 പറയുന്നത്, 'കന്യക ഗര്‍ഭം ധരിച്ച് ഒരു പുത്രനെ പ്രസവിക്കും അവന്‍ എമ്മാനുവേല്‍ എന്ന് വിളിക്കപ്പെടും' എന്നാണ്.  മിശിഹായുടെ വരവിന് എഴുന്നൂറിലധികം വര്‍ഷം മുമ്പ് ഏശയ്യാ നടത്തിയ പ്രവചനത്തിന്റെ പൂര്‍ത്തീകരണമാണ് സുവിശേഷത്തില്‍ നിറവേറുന്നതായി നാം കാണുന്നത്. ഏശയ്യാ 11:1 പറയുന്നു: ''ജസെയുടെ കുറ്റിയില്‍നിന്ന് ഒരു മുള കിളിര്‍ത്തുവരും, അവന്റെ വേരില്‍നിന്ന് ഒരു ശാഖ പൊട്ടിക്കിളിര്‍ക്കും.'' പൊട്ടിക്കിളിര്‍ക്കും എന്ന ക്രിയാപദത്തിന് ഹീബ്രുവില്‍ ഉപയോഗിക്കുന്നത് 'നസര്‍' എന്ന മൂലമാണ്. അതിന്റെ അര്‍ഥം പൊട്ടിമുളയ്ക്കുക, പുഷ്പിക്കുക എന്നൊക്കെയാണ്. ജസെയുടെ കുറ്റിയില്‍നിന്നും ഒരു മുള കിളിര്‍ത്തുവരുന്നതിന് ആരംഭം കുറിക്കുന്നത് ''നസര്‍'' എന്ന മൂലത്തില്‍നിന്നാരംഭിക്കുന്ന ഒരു നാമം ഉള്‍ക്കൊള്ളുന്ന നസ്രത്ത് എന്ന ഗ്രാമത്തില്‍നിന്നാണ് എന്നത് പഴയനിയമത്തിലെ മിശിഹാപ്രവചനത്തിലേക്കു നമ്മുടെ ശ്രദ്ധ ക്ഷണിക്കുന്നു. പഴയനിയമത്തില്‍ ഒരിക്കല്‍പോലും പ്രതിപാദിച്ചിട്ടില്ലാത്ത സ്ഥലമാണ് നസ്രത്ത്. ഈശോയുടെ കാലത്തും തീര്‍ത്തും അപ്രധാനമെന്നു കരുതിയിരുന്ന ഒരു പ്രദേശമായിരുന്നു അത്. സാധാരണജനത്തിന്റെ ഭാഷയില്‍ ഒരു നന്മയും പ്രതീക്ഷിക്കാതിരുന്ന സ്ഥലം. നത്താനിയേലിന്റെ വാക്കുകളില്‍നിന്നും നമുക്ക് ഇതു മനസ്സിലാകുന്നു (യോഹ 1:46). നസ്രത്ത് എന്ന സ്ഥലം നമുക്കു പങ്കുവെച്ചുതരുന്ന ഒരു ചിന്ത ദൈവത്തിന്റെ മുമ്പില്‍ എല്ലാവര്‍ക്കും ഒരു സ്ഥാനമുണ്ട് എന്നതാണ്. ഒരുപക്ഷേ മനുഷ്യരുടെ കാഴ്ചപ്പാടില്‍ ഒരു സ്ഥാനവുമില്ലെങ്കില്‍പ്പോലും ദൈവത്തിന്റെ മുമ്പില്‍ എല്ലാം പരിഗണിക്കപ്പെടുന്നു എന്ന മംഗളവാര്‍ത്തയാണ് നസ്രത്ത് പങ്കുവയ്ക്കുന്നത്. നസ്രത്തിലെ കന്യകയും ഇതുതന്നെയാണ് പഠിപ്പിക്കുന്നത്. മറിയത്തിന്റെ മഹത്ത്വം അവളുടെ എളിമയാണ്. മറിയം പറയുന്നു: ''അവിടുന്ന് തന്റെ ദാസിയുടെ താഴ്മയെ കടാക്ഷിച്ചു'' (ലൂക്കാ 1:48). അപ്പോക്രിഫല്‍ പുസ്തകത്തില്‍ മറിയം തന്റെ അമ്മയായ അന്നയോടു പറയുന്ന ഒരു ആഗ്രഹം രേഖപ്പെടുത്തുന്നു. മിശിഹാ വന്നു പിറക്കുന്ന രാജകൊട്ടാരത്തില്‍ ഒരു തോഴിയാകാനെങ്കിലും എനിക്കു സാധിച്ചാല്‍ മതിയായിരുന്നു. ഈ എളിമയാണ് മറിയത്തിന്റെ മഹത്ത്വം. കാരണം, ദൈവത്തിന്റെ സന്നിധില്‍ അവള്‍ കൃപ കണ്ടെത്തിയിരിക്കുന്നു (ലൂക്കാ 1:30). പരിശുദ്ധാത്മാവ് നിന്റെമേല്‍വരും; ദൈവത്തിന്റെ ശക്തി നിന്റെമേല്‍ ആവസിക്കും എന്നാണ് ദൈവദൂതന്‍ മറിയത്തോടു പറയുന്നത് (1:35). പരിശുദ്ധാത്മാവ്, ദൈവത്തിന്റെ ശക്തി എന്നത് ഉത്പത്തി 1:2 ലേക്കാണ് നമ്മുടെ ശ്രദ്ധ ക്ഷണിക്കുന്നത്. സൃഷ്ടിപരമായ ദൈവത്തിന്റെ ശക്തി, ദൈവത്തിന്റെ ആത്മാവ് മറിയത്തില്‍ ആവസിക്കുകയും വചനം മാംസം ധരിക്കപ്പെടുകയും ചെയ്യുന്നു. ഉത്പത്തിപ്പുസ്തകത്തില്‍ വചനത്താല്‍ എല്ലാം സൃഷ്ടിക്കപ്പെടുന്നുവെങ്കില്‍ ഇവിടെ വചനം (സ്രഷ്ടാവ്) തന്നെ സ്ഷ്ടിയായി മാറുന്നു. ആ മംഗളവാര്‍ത്തയാണ് മറിയത്തോടു മാലാഖ പറയുന്നത്. കാരണം, ദൈവത്തിന്റെ മുമ്പില്‍ ഒന്നും അസാധ്യമല്ല. ആ അനന്തമായ സാധ്യതയ്ക്കുമുമ്പില്‍ സ്വയം സമര്‍പ്പിക്കുന്നതാണ് 'ഇതാ കര്‍ത്താവിന്റെ ദാസി നിന്റെ വാക്ക് നിറവേറട്ടെ' എന്ന മറുപടിയിലൂടെ വ്യക്തമാക്കുന്നത്. ആ സമര്‍പ്പണം മംഗളവാര്‍ത്തയായി ഭവിക്കുന്നു. ദൈവത്തിന്റെ ഹിതത്തിനുമുമ്പിലുള്ള മനുഷ്യന്റെ സമര്‍പ്പണമാണ് മംഗളവാര്‍ത്തകള്‍ സൃഷ്ടിക്കുന്നത്. നാം ബലിയര്‍പ്പിക്കുന്ന ഓരോ അള്‍ത്താരകളിലും നിറവേറുന്നത് ഈ മംഗളവാര്‍ത്തയാണ്. ദൈവം അപ്പമായി അവതരിക്കുന്നു. മനുഷ്യന്റെ അധ്വാനത്തിന്റെ ഫലമായ അപ്പം ദൈവത്തിനുമുമ്പില്‍ അര്‍പ്പിക്കുമ്പോള്‍ അവിടെ അവതീര്‍ണനാകുന്നു. ഇത് നമ്മെ പഠിപ്പിക്കുന്നതും മനുഷ്യന് അസാധ്യമാണ് പക്ഷേ ദൈവത്തിന് സാധ്യമാണ് എന്നാണ്. എന്നാല്‍, മനുഷ്യന്റെ ഒരു സമര്‍പ്പണം ആവശ്യമാണ്. മറിയത്തിന്റെ സ്വയം സമര്‍പ്പണത്തില്‍ മനുഷ്യനായി അവതരിച്ചവന്‍ ഇന്ന് ബലിവേദിയില്‍ നാം അര്‍പ്പിക്കുന്ന അപ്പത്തിലും വീഞ്ഞിലും അവതരിക്കുന്നു. ബലിവേദിയില്‍നിന്നും മിശിഹായെ സ്വീകരിക്കുന്നവര്‍ മറിയത്തെപ്പോലെ മിശിഹായെ വഹിക്കുന്നവരും, മിശിഹായെ ലോകത്തിനു നല്‍കുന്നവരുമാകുന്നു എന്ന മംഗളവാര്‍ത്തയാണ് അള്‍ത്താരയിലെ ബലിവേദിയില്‍നിന്നു നാം ഉള്‍ക്കൊള്ളേണ്ടത്. കാരണം, ദൈവത്തിന്റെ ശക്തി നമ്മില്‍ ആവസിക്കുന്നു, നാം പരിശുദ്ധാത്മാവിന്റെ ആലയമാകുന്നു (1കോറി 6:19). അങ്ങനെ ആരാധനാസമൂഹം ക്രിസ്തുവിന്റെ ശരീരവും ഓരോരുത്തരും അതിലെ അവയവവും ആകുന്നു (1 കോറി 12:27). മിശിഹായുടെ മനുഷ്യാവതാരത്തിന്റെ തിരുനാള്‍ ആചരിക്കുന്നതിനൊരുങ്ങുമ്പോള്‍ വചനം നല്‍കുന്ന സന്ദേശം ഇന്നും മിശിഹാ നിന്നില്‍ രൂപം കൊള്ളുന്നു എന്നതാണ്. അതിന് മറിയത്തെപ്പോലെ നീയും വചനത്തിനു സ്വയം സമര്‍പ്പിക്കണം. കാരണം, നീയല്ല ക്രിസ്തുവാണ് നിന്നില്‍ ജീവിക്കേണ്ടത് (ഗലാത്തി 2:20). എന്തെന്നാല്‍, നിങ്ങള്‍ നിങ്ങളുടെ സ്വന്തമല്ല നിങ്ങള്‍ വിലയ്ക്കു വാങ്ങപ്പെട്ടവരാണ് (1 കോറി 6:20).