ആ പൂന്തോട്ടത്തിലെ പ്രധാന കൂട്ടുകാരായിരുന്നു സൂര്യകാന്തിയും അപ്പൂപ്പന്‍താടിയും. അവിടെ ഒരു കുഞ്ഞുകാക്ടസ്‌ചെടിയും ഉണ്ടായിരുന്നു. സൂര്യകാന്തിയും അപ്പൂപ്പന്‍താടിയും കാക്ടസ് ചെടിയെ കളിയാക്കുമായിരുന്നു. ഒരു ദിവസം സൂര്യകാന്തിയും അപ്പൂപ്പന്‍താടിയും പന്തുകൊണ്ടു കളിക്കുകയായിരുന്നു. കളിക്കിടെ പന്ത് എങ്ങനെയോ കാക്ടസ് ചെടിയുടെ അടുക്കലേക്കു തെറിച്ചുപോയി. കാക്ടസ് ചെടി അതിനെ എടുത്തു. പക്ഷേ, കാക്ടസിന്റെ കൈയിലെ മുള്ളുകള്‍കൊണ്ട് പന്തുപൊട്ടിപ്പോവുകയും അതുകണ്ട് സൂര്യകാന്തിക്കും അപ്പൂപ്പന്‍താടിക്കും ദേഷ്യം വരികയും ചെയ്തു. അവര്‍ കാക്ടസിനെ വഴക്കു പറഞ്ഞു.
    ദിവസങ്ങള്‍ കടന്നുപോയി. ഒരു ദിവസം കാക്ടസ് താന്‍ കാരണം മറ്റുള്ളവര്‍ക്കു പ്രശ്‌നമാണെന്നു കരുതി വിഷമിച്ചിരിക്കുകയായിരുന്നു. അപ്പോള്‍ ഒരു മുള്ളന്‍പന്നി അവന്റെ അടുത്തേക്കു വന്നു. അവന്‍ അവന്റെ കണ്ണീര്‍തുടച്ച് മുള്ളന്‍പന്നിയെ നോക്കി. അന്ന് അവന്‍ മനസ്സിലാക്കി, തന്നെപ്പോലെ തന്നെ മറ്റുള്ളവരും ഈ ഭൂമിയിലുണ്ടെന്ന്. മുള്ളന്‍പന്നിയോടു കാക്ടസ് ചെടി തന്റെ ജീവിതത്തില്‍ നടന്ന സംഭവങ്ങള്‍ പറഞ്ഞു. അവര്‍ ചിരിച്ചും കളിച്ചും കൂട്ടുകാരായി. അവരുടെ സൗഹൃദം കണ്ട് അഹങ്കാരികളായ സൂര്യകാന്തിക്കും അപ്പൂപ്പന്‍താടിക്കും അസൂയ തോന്നി.

ഐറിന്‍ ആന്‍ ജോജോ
ക്ലാസ് 5
സെന്റ് മേരീസ് ജി.എച്ച്.എസ്.
കുറവിലങ്ങാട്‌