നാമനിര്‍ദേശപത്രികയുടെ സൂക്ഷ്മപരിശോധനയും പിന്‍വലിക്കലും പൂര്‍ണമായതോടെ മത്സരാര്‍ഥികളുടെ യഥാര്‍ഥ ചിത്രം വ്യക്തമായി. മൂന്നു മുന്നണികളില്‍പ്പെട്ടവരും സ്വതന്ത്രരുമായി ഒരു ലക്ഷത്തോളംപേരാണ് ദേശസേവനത്തിനു ജനവിധി തേടുന്നത്. തത്ത്വത്തില്‍ തദ്ദേശസ്ഥാപനങ്ങളിലേക്കുള്ള തിരഞ്ഞെടുപ്പ് ജനാധിപത്യത്തിലെ ഒരു പ്രാദേശികക്രമീകരണമാണ്. പ്രത്യയശാസ്ത്രങ്ങള്‍ മാറ്റുരയ്ക്കുന്ന ഒരു പോരാട്ടമല്ലത്. എന്നാല്‍, പതിവിനു വ്യത്യസ്തമായി ഇത്തവണ തിരഞ്ഞെടുപ്പ് അടിമുടി രാഷ്ട്രീയസ്വഭാവമുള്ളതാണ്. അതിനുള്ള കാരണം അടുത്തവര്‍ഷം ആദ്യപകുതിയില്‍ നടക്കാനിരിക്കുന്ന നിയമസഭാതിരഞ്ഞെടുപ്പാണ്.
   അടുത്ത നിയമസഭാതിരഞ്ഞെടുപ്പ് മൂന്നു മുന്നണികള്‍ക്കും ഒരുപോലെ പ്രധാനപ്പെട്ടതാണ്. ചരിത്രത്തിലാദ്യമായി തുടര്‍ഭരണം ലഭിച്ച ഇടതുപക്ഷത്തിന് തങ്ങളില്‍ ജനം അര്‍പ്പിച്ച വിശ്വാസം സംരക്ഷിച്ചുവെന്നു തെളിയിക്കേണ്ടതായിട്ടുണ്ട്. വലിയ വ്യത്യാസത്തില്‍ അധികാരം നഷ്ടപ്പെട്ടാല്‍ ജനം തള്ളി എന്ന വ്യാഖ്യാനമുണ്ടാകും. അതു പാര്‍ട്ടിക്കു ക്ഷീണം ചെയ്യും. തിരഞ്ഞെടുപ്പിനെ നേരിടുന്ന സമയത്ത് ജനങ്ങളുടെ മനസ്സില്‍ ശബരിമല സ്വര്‍ണക്കൊള്ള സജീവമായിരുന്നാലുണ്ടാകാവുന്ന അവസ്ഥയെക്കുറിച്ചു പാര്‍ട്ടിക്കു നല്ല ബോധ്യമുണ്ട്. യുഡിഎഫിനും അടുത്ത നിയമസഭാതിരഞ്ഞെടുപ്പ് ജീവന്മരണപോരാട്ടമാണ്. പത്തുവര്‍ഷമായി അധികാരത്തിനു പുറത്താണ്. ഒരു പ്രാവശ്യംകൂടി പ്രതിപക്ഷത്തുനിന്നാല്‍ പാര്‍ട്ടി വലിയ തോതില്‍ ചെറുതാകും. അധികാരമില്ല, പാര്‍ട്ടിയോടു ചേര്‍ന്നുനിന്നിട്ടു പ്രയോജനമില്ലെന്ന പ്രായോഗികതീരുമാനത്തിലേക്കു പാര്‍ട്ടി അനുഭാവികള്‍പോലും എത്തിച്ചേരുമെന്ന് നേതാക്കള്‍ക്കറിയാം. ബിജെപിക്കും അടുത്ത നിയമസഭാ തിരഞ്ഞെടുപ്പ് നിര്‍ണായകമാണ്. ഒരു എംഎല്‍എ യും ഒരു എംപിയും  ഉണ്ടായെങ്കിലും പാര്‍ട്ടിക്കു കേരളത്തില്‍ വേരുറപ്പിക്കാനോ സ്ഥിരത കൈവരിക്കാനോ  സാധിച്ചിട്ടില്ല. പുതിയ അധ്യക്ഷന്റെ നേതൃത്വത്തില്‍ നടത്തുന്ന പോരാട്ടം അദ്ദേഹത്തിന്റെ നേതൃത്വത്തിന്റെ വിലയിരുത്തല്‍കൂടിയാകും.
   ഇപ്പോള്‍ നടക്കുന്ന പഞ്ചായത്തുതിരഞ്ഞെടുപ്പിനെ മൂന്നു മുന്നണികളും ഗൗരവമായി സമീപിച്ചിരിക്കുന്നുവെന്നു പറയുന്നത് രണ്ടു ന്യായങ്ങളുടെ അടിസ്ഥാനത്തിലാണ്. ഒന്നാമത്തേത്, സ്ഥാനാര്‍ഥിനിര്‍ണയത്തില്‍ പ്രകടിപ്പിച്ച സൂക്ഷ്മതയും ജാഗ്രതയുമാണ്. നല്ല സ്ഥാനാര്‍ഥികളെ കണ്ടെത്താനും റിബലുകളെ ഭീഷണികൊണ്ടുപോലും പിന്‍വലിപ്പിക്കാനും നടത്തിയ നീക്കങ്ങളുടെ  റിപ്പോര്‍ട്ട് രാഷ്ട്രീയബോധമുള്ളവരുടെ മുമ്പിലുണ്ട്. പ്രധാനപ്പെട്ട കോര്‍പറേഷനുകളില്‍ ചിലയിടങ്ങളില്‍ മുന്‍ എം.എല്‍.എ.മാരോ ദീര്‍ഘകാലഅനുഭവസമ്പത്തുള്ള ബ്യൂറോക്രാറ്റുകളോ ആണ് സ്ഥാനാര്‍ഥികള്‍. പഞ്ചായത്തു വാര്‍ഡുകളില്‍പോലും മുന്‍ എം.എല്‍.എ. മാര്‍ മത്സരിക്കുമ്പോള്‍ ഈ തിരഞ്ഞെടുപ്പിനെ മുന്നണികള്‍ എത്ര വലിയ പ്രാധാന്യത്തോടെ വിലയിരുത്തുന്നു എന്നു വ്യക്തമാണ്. വ്യക്തമായ മുന്‍തൂക്കത്തോടെയാണ് ഇടതുപക്ഷം തിരഞ്ഞെടുപ്പിനെ നേരിടുന്നത്. അത് ആത്മവിശ്വാസത്തേക്കാളേറെ മാനസികസമ്മര്‍ദമുണ്ടാക്കുന്നു. ഭരണവിരുദ്ധവികാരവും ശബരിമലവിഷയവും ജനങ്ങള്‍ മറക്കാതിരുന്നാലുണ്ടാകാവുന്ന അവസ്ഥ നേതാക്കളുടെ ഉറക്കംകെടുത്തുന്നു. ഇനി ഒരവസരം ഉണ്ടായെന്നു വരില്ലെന്ന ചിന്ത യുഡിഎഫിനെ അലട്ടുന്നു. ഇത്തവണയെങ്കിലും കടന്നുകൂടിയില്ലെങ്കില്‍ എന്നന്നേക്കുമായി തങ്ങളുടെ മനസ്സില്‍ നിയമസഭാകവാടം അടഞ്ഞുകിടക്കുമോ എന്ന ഭയം ബിജെപിയെയും അസ്വസ്ഥതപ്പെടുത്തുന്നുണ്ട്.
    രണ്ടാമത്തെ കാര്യം, പഞ്ചായത്തുതിരഞ്ഞെടുപ്പിനു മൂന്നു മുന്നണികളും പുറത്തിറക്കിയ പ്രകടനപത്രികയാണ്. വരാനിരിക്കുന്ന നിയമസഭാതിരഞ്ഞെടുപ്പിന്റെ കരട് പ്രകടനപത്രികപോലെ ഇതിനെ വിലയിരുത്തണം. പ്രകടനപത്രിക ആശ്വാസവും ആഹ്ലാദവും പകരുന്നതാണ്. ഉപജീവനം തേടിയും ജീവരക്ഷാര്‍ഥവും വിദേശത്തേക്കു പലായനം ചെയ്ത മലയാളികള്‍ക്കു തിരിച്ചുവരാന്‍ പ്രചോദനം പകരുന്ന, തേനും പാലും ഒഴുകുന്ന പ്രകടനപത്രികയാണ് പുറത്തുവന്നത്. എല്ലാവര്‍ക്കും ഭക്ഷണം, വീട്, വിദ്യാഭ്യാസം, തൊഴില്‍, ചികിത്സ. ഇതില്‍ കവിഞ്ഞ് ആവശ്യങ്ങള്‍ ആര്‍ക്കുണ്ട്? ഇതിനുപുറമേയാണ്  തെരുവുനായശല്യത്തില്‍നിന്നു മോചനവും, വന്യമൃഗങ്ങളില്‍നിന്നു സംരക്ഷണവുമൊക്കെ പ്രഖ്യാപിച്ചിട്ടുള്ളത്. തിരുവനന്തപുരം കോര്‍പറേഷന്‍ ബിജെപി ഭരിക്കുന്ന സാഹചര്യമുണ്ടായാല്‍ സാക്ഷാല്‍ പ്രധാനമന്ത്രിതന്നെ നേരിട്ടെത്തി തിരുവനന്തപുരത്തിന്റെ വികസനപത്രിക അവതരിപ്പിച്ച് ഫണ്ട് അനുവദിച്ച് കേരളത്തെ പറുദീസയാക്കും.
  ഏതായാലും കേരളീയര്‍ ഭാഗ്യമുള്ളവരാണ്. നല്ല വാഗ്ദാനങ്ങള്‍ കേള്‍ക്കാനുള്ളതാണ് ഈ ഭാഗ്യം. ഏതു മുന്നണി ഭരണത്തില്‍വന്നാലും ഈ വാഗ്ദാനങ്ങളെല്ലാം നിറവേറ്റപ്പെടും.
   ഒരു കാര്യം ഉറപ്പാണ്. നിയമസഭാതിരഞ്ഞെടുപ്പുപോലെ തദ്ദേശതിരഞ്ഞെടുപ്പ് നിരാശപ്പെടുത്തുകയില്ല. മൂന്നു മുന്നണികളുണ്ടെങ്കിലും നിയമസഭാതിരഞ്ഞെടുപ്പ്  കഴിയുമ്പോള്‍ രണ്ടു മുന്നണികള്‍ പുറത്താകും. ഭൂരിപക്ഷമുള്ള മുന്നണി മാത്രം ഭരിക്കും. തദ്ദേശതിരഞ്ഞെടുപ്പില്‍ മൂന്നു മുന്നണികള്‍ക്കും ഭരണം ലഭിക്കും. ആരൊക്കെ എവിടെയൊക്കെ ഭരിക്കുമെന്നറിയാന്‍ ഡിസംബര്‍ പതിമ്മൂന്നുവരെ കാത്തിരിക്കണം.