സ്വന്തം ലേഖകൻ 
മനില: ഫിലിപ്പീന്‍സില്‍ ആദ്യമായി ഇപാകിത മോ (ഷോ ഇറ്റ്) എന്ന പ്രമേയവുമായി സമൂഹമാധ്യമങ്ങളിലൂടെ സംഘടിപ്പിച്ച ടിക് ടോക് മത്സരത്തില്‍ മനില അതിരൂപതയില്‍ സേവനം ചെയ്യുന്ന യുവ കത്തോലിക്കാ വൈദികന് അവാര്‍ഡ്. ''ഫാ. ടിക് ടോക്'' എന്നു വിളിപ്പേരുള്ള ഫാ. ഫിയേല്‍ പരേജയാണ് ''റൈസിങ് സ്റ്റാര്‍'' വിഭാഗത്തില്‍ അവാര്‍ഡിന് അര്‍ഹനായിരിക്കുന്നത്. ജൂലൈ നാലിന് യൂട്യൂബ്, ഫേസ്ബുക്ക് എന്നിവയിലെ ''ടിക് ടോക് ഫിലിപ്പീന്‍സ്'' എന്ന പേജിലൂടെ സംഘടിപ്പിച്ച മത്സരത്തില്‍ ഫാ. പരേജയ്ക്ക് പുറമേ യൂട്യൂബ് താരങ്ങളും കൊമേഡിയനും, ബോയ് ബാന്‍ഡും വിജയികളായി. കഴിഞ്ഞ വര്‍ഷമാണ് ഫാ. പരേജ തന്റെ ടിക് ടോക് അക്കൗണ്ട് ആരംഭിക്കുന്നത്. ഏതാണ്ട് 11 ലക്ഷം പേരാണ് നിലവില്‍ അദ്ദേഹത്തെ ഫോളോ ചെയ്യുന്നത്.
ബൈബിള്‍ വിചിന്തനങ്ങളും പ്രാര്‍ത്ഥനകളും മാര്‍ഗനിര്‍ദേശങ്ങളുമാണ് അദ്ദേഹം പോസ്റ്റ് ചെയ്യുന്നതെങ്കിലും, സമൂഹ മാധ്യമചലഞ്ചുകളിലും പങ്കെടുക്കാറുണ്ട്. 'വൈപ് ഇറ്റ് ഡൗണ്‍' ചലഞ്ചില്‍ പോസ്റ്റ് ചെയ്ത വീഡിയോ അദ്ദേഹത്തെ അവാര്‍ഡിനര്‍ഹനാക്കുന്നതില്‍ നിര്‍ണായകപങ്കുവഹിച്ചു. കണ്ണാടിക്കു മുന്നില്‍ നില്‍ക്കുന്ന ഫാ. പരേജ തുണികൊണ്ട് കണ്ണാടി തുടയ്ക്കുന്നതാണ് വീഡിയോയുടെ ഉള്ളടക്കം. ഓരോ തവണ അദ്ദേഹം കണ്ണാടി തുടയ്ക്കുമ്പോഴും ഓരോ പുതിയ വസ്ത്രത്തിലാണ് കണ്ണാടിയില്‍ അദ്ദേഹത്തെ കാണുന്നത്. ഈ വീഡിയോ പതിനായിരക്കണക്കിന് ആളുകളാണ് കണ്ടത്.
അതേസമയം 90 സെക്കന്‍ഡ് ദൈര്‍ഘ്യമുള്ള ബൈബിള്‍ വിചിന്തനങ്ങള്‍ ലക്ഷക്കണക്കിന് ആളുകള്‍ കാണുന്നുണ്ടെന്നതും ശ്രദ്ധേയമാണ്. തന്റെ സ്വന്തം ഭാഷയിലും ഇംഗ്ലീഷിലുമായി കത്തോലിക്കാ ഉള്ളടക്കമുള്ള നിരവധി വീഡിയോകളാണ് ഫാ. പരേജ ടിക് ടോക്കില്‍ പോസ്റ്റ് ചെയ്തിട്ടുള്ളത്.
കൊവിഡ് പകര്‍ച്ചവ്യാധിക്കാലത്ത് സുവിശേഷങ്ങളെയും സങ്കീര്‍ത്തനങ്ങളെയും ആസ്പദമാക്കി അദ്ദേഹം നിര്‍മിച്ച ചെറു വീഡിയോകള്‍ വന്‍തരംഗമായിരുന്നു. പത്തുലക്ഷം ആളുകള്‍ കണ്ട വീഡിയോകളും ഇവയില്‍ ഉള്‍പ്പെടുന്നു.
