ജോര്ജുകുട്ടി താവളം
മന്നിടം കാലങ്ങളായ്
കാത്തിരുന്നതാം നേരം
വന്നതിന്‍ സന്തോഷത്താല്‍
നിറഞ്ഞു മനസ്സുകള്‍
പാപാന്ധകാരം നീക്കി
നേര്‍വഴി തെളിക്കുന്ന
ദീപമായ് സര്‍വ്വാധിപന്‍
തന്‍സുതന്‍ വന്നീ ഭൂവില്‍.
ജാതനായ് ദൈവാത്മജന്‍
കന്യയില്‍നിന്നും രാവില്‍
ഭൂതലം പുളകംകൊ-
ണ്ടാനല്ല നിമേഷത്തില്‍
ആട്ടിടയര്‍തന്‍ ചാരേ
വന്നൊരു ദൈവദൂതന്‍
ഞെട്ടലോടവര്‍ നില്‌ക്കേ
ചൊല്ലിയാ സത്യം വേഗം:
'ദാവീദിന്‍ പട്ടണത്തില്‍
ജാതനായൊരു പൈതല്‍
ഏവര്‍ക്കും രക്ഷകനാം
ക്രിസ്തുവെന്നറിയേണം.
സ്വര്‍ഗത്തില്‍നിന്നു ദേവ-
ദൂതര്‍തന്‍ വ്യൂഹമപ്പോള്‍
നിര്‍ഗ്ഗമിച്ചിഹത്തിലേ-
യ്‌ക്കൊരു നല്‍വചസ്സുമായ്
'ഉന്നതേ ദൈവത്തിന്നു
മഹത്ത്വം ധരയിലോ
സന്മനസ്സുള്ളോര്‍ക്കുണ്ടാം
സമാധാനവും നൂനം'
ആശ്ചര്യഭരിതരാ-
യജപാലകര്‍ പെട്ടെ-
ന്നാശിശുവിനെക്കാണാ-
നോടിയാ നിശീഥത്തില്‍.
പിള്ളക്കച്ചയില്‍പ്പൊതി-
ഞ്ഞൊരു കുഞ്ഞിനെക്കണ്ടി-
ട്ടുള്ളങ്ങള്‍ നിറഞ്ഞവര്‍
കരങ്ങള്‍ കൂപ്പി മോദാല്‍
കൈവന്ന ഭാഗ്യത്തിനാല്‍
യൗസേപ്പും മറിയവും
ദൈവത്തെ സ്തുതിച്ചുകൊ-
ണ്ടുണ്ണിയെ നോക്കിനിന്നു.
