മിഴിനീര്‍

കര്‍ക്കടകമാസ പെരുമഴപ്പെയ്ത്തില്‍

കണ്ണു നനയ്ക്കുന്ന കാഴ്ചകള്‍ കണ്ടു
ഉറ്റവര്‍ ഉടയവര്‍ നഷ്ടപ്പെടുമ്പൊഴും
ഉറ്റുനോക്കുന്നൊരു കാഴ്ച ഞാന്‍ കണ്ടു
ഇന്നലെ സ്വപ്നച്ചിറക് വിരിച്ചവര്‍
ഇന്നെന്റെ മുന്നില്‍ പൊലിഞ്ഞു കിടക്കുന്നു
മണ്ണില്‍ പടുത്ത സൗധങ്ങളെല്ലാം
മണ്ണോടു ചേരുന്ന കാഴ്ചകള്‍ കണ്ടു
പറ്റിപ്പിടിച്ചു വളര്‍ന്ന ബന്ധങ്ങള്‍
തെറ്റിത്തെറിച്ചു മലര്‍ന്നു കിടക്കുന്നു
കൊഞ്ചിച്ചു കൊഞ്ചിച്ചു മതിവരാതപ്പൊഴും
നെഞ്ചോടു ചേര്‍ന്നൊരു പാവ കിടക്കുന്നു
അമ്മിഞ്ഞപ്പാലു നുണയുവാന്‍ കുഞ്ഞുങ്ങള്‍
അമ്മതന്‍ മാറിടം തപ്പിത്തളരുന്നു
അച്ഛന്‍ വരുമോയെന്നൊരു ചോദ്യത്തിന്‍
ഉത്തരം തേടുന്നമ്മക്കനലുകള്‍
കണ്ഠംവരെ ചെളിക്കുണ്ടിലമരുന്ന
കണ്ഠമിടറുന്ന ഒച്ചകള്‍ കേള്‍ക്കുന്നു
പുത്തനുടുപ്പിട്ടിനി വരില്ലവരെന്ന്
പുസ്തകസഞ്ചികള്‍ ചെളിപുരളുന്നു
രക്ഷാപ്രവര്‍ത്തനം നടത്തുവാന്‍ സേനകള്‍
തല്‍ക്ഷണമെത്തുന്ന കാഴ്ചകള്‍ കാണുന്നു
കൈതവമില്ലാത്ത നാടിന്‍ മനസ്സുകള്‍
കൈകള്‍ പിടിക്കുന്നു ആലംബഹീനരെ
ചന്തത്തിലെഴുതിയ നാടിന്റെ ഭൂപടം
ചീന്തിയെറിഞ്ഞതാരുടെ വികൃതികള്‍!

മിഴിനീര്‍

Newsletter