കൊച്ചി: പൂന ആസ്ഥാനമായി അശരണര്‍ക്കായി പ്രവര്‍ത്തിക്കുന്ന മാഹേര്‍ ഫൗണ്ടേഷന്റെ സ്ഥാപക, സിസ്റ്റര്‍ ലൂസി കുര്യന് ഓസ്ട്രിയന്‍ ബഹുമതി. ഓസ്ട്രിയ ആസ്ഥാനമായ ഊം (oom) മാസികയുടെ ലോകത്തെ ഏറ്റവും സ്വാധീനമുള്ള 100 പേരുടെ പട്ടികയില്‍ സിസ്റ്റര്‍ ലൂസി കുര്യനും ഇടംപിടിച്ചു. 
പട്ടികയില്‍ പന്ത്രണ്ടാം സ്ഥാനത്താണ് ലൂസി കുര്യന്‍. 1955 സെപ്റ്റംബര്‍ 10 ന് ജനിച്ച സിസ്റ്ററിന്റെ വിദ്യാഭ്യാസം കോളയാട് സെന്റ് സേവ്യേഴ്സ് സ്‌കൂളിലും തുടര്‍ന്നു മുംബൈയിലുമായിരുന്നു. 1977 ല്‍ ഹോളിക്രോസ് സന്ന്യാസിനീ സഭയില്‍ ചേര്‍ന്നു. 1980 ല്‍ വ്രതവാഗ്ദാനം നടത്തി. വിവിധ ചൂഷണങ്ങള്‍ക്കിരയായ സ്ത്രീകളെ സഹായിക്കാന്‍ ഹോളി ക്രോസ് കോണ്‍വെന്റിലെ സിസ്റ്റര്‍ നോയിലിന്‍ പിന്റോ സ്ഥാപിച്ച ഹോപ് എന്ന സംഘടനയില്‍ 1989 ല്‍ ചേര്‍ന്നു.
1997 ല്‍  പൂനയില്‍ സ്ഥാപിച്ച മാഹേര്‍ പ്രസ്ഥാനം രാജ്യത്തിന്റെ വിവിധ ഭാഗങ്ങളിലായി രണ്ടായിരത്തോളം അനാഥര്‍ക്കാണ് അഭയം നല്‍കുന്നത്. ജാതിമതകക്ഷിരാഷ്ട്രീയ ചിന്തകള്‍ക്കതീതമായ സര്‍വമത സ്നേഹസേവന സംരംഭമാണ് മാഹേര്‍. എറണാകുളം ജില്ലയില്‍ മുളന്തുരുത്തിക്കടുത്ത് പെരുമ്പിള്ളിയില്‍ നിരാലംബരായ ആണ്‍കുട്ടികളുടെയും പെണ്‍കുട്ടികളുടെയും അമ്മവീട്, മുതിര്‍ന്ന പെണ്‍കുട്ടികളുടെ മാഹേര്‍ സ്‌നേഹകിരണ്‍, പുരുഷന്‍മാരുടെ മാഹേര്‍ സ്നേഹകിരണ്‍, മാഹേര്‍ സ്നേഹതീരം എന്നീ സംരക്ഷണകേന്ദ്രങ്ങള്‍ പ്രവര്‍ത്തിക്കുന്നു.
2017 ല്‍ സിസ്റ്റര്‍ ലൂസി കുര്യന്‍, ഇന്റര്‍ഫെയ്ത് അസോസിയേഷന്‍ ഫോര്‍ സര്‍വീസ് ടു ഹ്യൂമാനിറ്റി ആന്‍ഡ് നേച്ചര്‍ എന്ന സംഘടന പൂനയില്‍ സ്ഥാപിച്ചു. ഈ സംഘടനയില്‍ എട്ടു രാജ്യങ്ങളില്‍നിന്നുള്ള 198 അംഗങ്ങളോളം സേവനം ചെയ്യുന്നുണ്ട്. 2016 - ല്‍ ഇന്ത്യയില്‍ വനിതകള്‍ക്കു നല്‍കുന്ന പരമോന്നത ബഹുമതിയായ 'നാരി ശക്തി പുരസ്‌കാരം' സിസ്റ്റര്‍ ലൂസി കുര്യനായിരുന്നു.